區議員嫖妓是一門大生意

資料轉載自東週網：http://eastweek.hk/index.php?aid=13946

民主黨總幹事陳家偉去尖沙咀香檳大廈搵鳳姐「全裸訪談」斷正，成為全城熱話，搞到民主黨雞毛鴨血（詳見今期「封面故事」），而佢老哥辭職退黨後遠走避傳媒，暫時人間蒸發，都幾慘情！

今次政黨人士尋歡似乎係個別事件，但一位極熟悉圈內情況嘅知情人士同小弟講，好嫖好滾嘅區議員不在少數，其中泛民成員也「大有人在」，因為佢哋驚上大陸嫖妓有機會中伏，多數在香港覓食，但會做足安全措施慎防曝光。

呢位知情人士話：「佢哋知道自己身份敏感，所以去嫖會好謹慎，有方法保證安全，例如經由極信得過嘅中間人安排，送到由其他人book嘅酒店房間『交易』，之後前後腳離開，神不知鬼不覺。」

熟知圈內情況人士披露，好嫖好滾嘅區議員不在少數，尋歡時多數會做足安全措施慎防曝光，陳家偉今次咁樣斷正，明顯係「初哥」。圖為香檳大廈鳳樓。

本來呢班好色區議員最佳去處係內地，因為冇人識佢哋，又有鐵竇，但自從何偉途在東莞被公安查房「捉正」後，大家都知北上玩樂有政治風險，所以迫於無奈留港消費，惟有盡量小心。

「班友心癮好大，幾年前香港政圈人士分批去台灣睇選舉，有人就喺夜晚『鼠』出去桑拿浴室或者卡拉OK搵女玩樂，順便考察埋台灣嘅色情事業，一齊去嘅都係好此道者，所以冇人會做二五仔爆料。」

呢位圈內人士對陳家偉今次咁樣斷正亦感錯愕：「我認識嘅『好嫖人士』冇包括陳家偉，佢讀神學，作風一直好正派，冇聽過佢好呢味嘢！佢去香檳大廈搵鳳姐，竟然同其他嫖客一齊排隊，又冇戴口罩，睇嚟佢係啱啱上癮，一癮到就忍唔住去搵食，冇諗過做防範措施，極之唔理智，可能佢情緒太壓抑啩！其他『老嫖』一定唔會犯咁嘅錯鋘！」

據佢所知，有嫖癮嘅政圈人士多數係區議員，立法會直選議員就好少，區議員知名度冇咁高，可以放膽啲，立法會議員如果出事就好大鑊，冇乜人敢制。

呢位人士指，何偉途「捉正」事件後，民主黨高層已作過提示，叫黨員遠離女色，慎防再墮桃色陷阱，但好色始終係人性，而且嫖呢樣嘢係會上癮嘅，所以仍有人繼續犯險。今次陳家偉出事後，呢類人應該會勒一勒，但風頭火勢過後，佢哋又會心思思，故態復萌！

前區議員何偉途在東莞召妓被公安「捉正」後，其他人再唔敢去內地尋歡。